ಗಜೇಂದ್ರಗಡ : (Nov_02_2025)
ಉತ್ತರ ಕರ್ನಾಟಕ ಮತ್ತು ಮಧ್ಯ ಕರ್ನಾಟಕದ ಹೆಂಗಳೆಯರ ಹಬ್ಬವೇ ಗೌರಿ ಹುಣ್ಣಿಮೆ. ಗದಗ ಜಿಲ್ಲೆಯ ಗಜೇಂದ್ರಗಡ ಸೇರಿದಂತೆ ಎಲ್ಲೆಡೆ ಗೌರಿ ಹುಣ್ಣಿಮೆಯ ಸಂಭ್ರಮ ಆರಂಭವಾಗಿದೆ.
ಗೌರಿ ದೇವಿಗೆ ಸಕ್ಕರೆಯಿಂದ ತಯಾರಿಸಿದ ಸಕ್ಕರೆ ಗೊಂಬೆಗಳಿಂದ ಆರತಿ ಬೆಳಗುವುದು ಈ ಹಬ್ಬದ ವಿಶೇಷ. ಗೌರಿ ಹಬ್ಬ ವರ್ಷಕ್ಕೆ ಎರಡು ಬಾರಿ ಬರುತ್ತದೆ. ಸೀಗೆ ಹುಣ್ಣಿಮೆಯಂದು ಸಣ್ಣ ಗೌರಿ ಹುಣ್ಣಿಮೆ ನಡೆದರೆ, ಈ ಭಾನುವಾರ ದೊಡ್ಡ ಗೌರಿ ಹುಣ್ಣಿಮೆ ಹಬ್ಬ. ಈ ಎರಡು ದಿನಗಳಂದು ಗೌರಿದೇವಿಯನ್ನು ಅಲಂಕರಿಸಿ, ಪೂಜಿಸಿ ಮಹಿಳೆಯರು ಸೇರಿದಂತೆ ಪುರುಷರು ನಮಿಸುವುದು ವಾಡಿಕೆ. ಆರತಿ ಬೆಳಗಿದ ಮನೆಯ ಹೆಣ್ಣು ಮಕ್ಕಳಿಗೆ ಕುಟುಂಬದಲ್ಲಿನ ಪುರುಷರು ಕಾಣಿಕೆ ನೀಡುತ್ತಾರೆ.
ಗೌರಿ ಹುಣ್ಣಿಮೆಗಾಗಿ ಪಟ್ಟಣದ ಮಾರುಕಟ್ಟೆಯಲ್ಲಿ ತಹರೆವಾರಿ ಸಕ್ಕರೆಗೊಂಬೆಗಳು ಲಗ್ಗೆ ಇಟ್ಟಿವೆ. ಮನೆಯವರು ಪೂಜಿಸುವ ಗೌರಿದೇವಿಗೆ ಮಹಿಳೆಯರು ಸಾಮೂಹಿಕವಾಗಿ ಸಕ್ಕರೆ ಆರತಿಯ ಆರತಿ ಬೆಳಗಿ ನೈವೇದ್ಯ ಸಮರ್ಪಿಸುತ್ತಾರೆ.
ಸಕ್ಕರೆ ಆರತಿಗಳನ್ನು ಕಟ್ಟಿಗೆಗಳಿಂದ ನಿರ್ಮಿಸಲಾದ ಅಚ್ಚುಪಡೆಗಳಲ್ಲಿ ಸಕ್ಕರೆಯ ಪಾಕ ಹಾಕುವ ಮೂಲಕ ಸಕ್ಕರೆ ಆರತಿ ತಯಾರಿಸುತ್ತಾರೆ.
ನವಿಲು, ಶಿವ ಪಾರ್ವತಿ, ಆನೆ, ಗೋಪುರದ ಚಿತ್ರಗಳನ್ನು ಹೋಲುವ ಆಕಾರಗಳ ಗೊಂಬೆಗಳನ್ನು ತಯಾರಿಸುತ್ತಾರೆ. ಇದಕ್ಕೆಂದೇ ಪ್ರತಿ ಊರಿನಲ್ಲಿ 2ರಿಂದ 3 ಜನ ಆರತಿ ತಯಾರಕರು ಹಬ್ಬ ಬರುವ 15 ದಿನಗಳ ಮುನ್ನ ಈ ಕಾರ್ಯದಲ್ಲಿ ತೊಡಗಿಸಿಕೊಳ್ಳುತ್ತಾರೆ. ಸಕ್ಕರೆಗೆ ನೀರು, ತುಸು ನಿಂಬೆ ರಸ ಬೆರೆಸಿ ಕುದಿಸಿ ಒಂದು ಹಂತಕ್ಕೆ ಬಂದಾಗ ಪಾಕವನ್ನು ಆಕಾರಗಳಲ್ಲಿ ಹಾಕಿ ಮೂರ್ತಿಗಳನ್ನು ತಯಾರು ಮಾಡುತ್ತಾರೆ. ಸಕ್ಕರೆ ಆರತಿಗಳನ್ನು ತಯಾರು ಮಾಡುವುದನ್ನೇ ತಿಂಗಳ ಉದ್ದಕ್ಕೂ ಉದ್ಯೋಗವನ್ನಾಗಿಸಿಕೊಂಡವರು ಇದ್ದಾರೆ. ಪ್ರತಿ ತಯಾರಕರು 30ರಿಂದ 50 ಕ್ವಿಂಟಲ್ ಸಕ್ಕರೆಯನ್ನು ಇದಕ್ಕೆಂದೆ ಬಳಸುತ್ತಾರೆ. ಒಂದು ಕ್ವಿಂಟಲ್ ಸಕ್ಕರೆಗೆ ಸುಮಾರು 60kgಗೂ ಹೆಚ್ಚು ಕೆ.ಜಿ. ಸಕ್ಕರೆ ಗೊಂಬೆಗಳಾಗುತ್ತವೆ ಎನ್ನುತ್ತಾರೆ ತಯಾರಕರು.
ಅತ್ತ ಗೌರಿ ಹಬ್ಬದಲ್ಲಿ ಆರತಿ ಬೆಳಗಿ ಹಬ್ಬ ಆಚರಿಸಿದರೆ ಇತ್ತ ಸಕ್ಕರೆ ಗೊಂಬೆಗಳನ್ನು ತಯಾರಿಸಿ ಮಾರಾಟ ಮಾಡಿ ಉತ್ತಮ ಲಾಭ ಗಳಿಸುತ್ತಾರೆ ತಯಾರಕರು. ಪದ್ಧತಿ ಮತ್ತು ಪರಂಪರೆಯ ಪ್ರತೀಕವಾಗಿ ಈ ಗೌರಿ ಹಬ್ಬ ನಿರಂತರವಾಗಿ ನಡೆದುಕೊಂಡು ಬರುತ್ತಿದೆ. ತನ್ನದೆ ಆದ ಪರಂಪರೆಯನ್ನ ಹೊಂದಿದೆ.
ವರದಿ : ದಾವಲಸಾಬ್ ತಾಳಿಕೋಟಿ, ಪತ್ರಕರ್ತರು, ವಕೀಲರು ಗಜೇಂದ್ರಗಡ.
ಸಂಪರ್ಕ : 7847802383
Post a Comment